就把我遺留在經典的時代 之七 甜蜜蜜

〈就把我遺留在經典的時代 之七 甜蜜蜜 Comrade, Almost a Love Story 〉

這不是一部愛情故事
是一部關於新移民離鄉別井、生活的電影
從英文戲名 Comrade, Almost a Love Story 就可以看得出......

如果這是一部愛情電影，設定未免太讓人反感了
黎小軍剛來香港，在路邊食飯盒、機舖看人打機及金拱門買東西的時候，我有些懷疑他的角色是否弱智的
在年宵擺檔之後的那個晚上，我心想黎小軍你不是弱智兼天津有個女朋友的嗎？這樣也可以搞得上？
話時話......係咪好似都無解釋到黎小軍點解一路著泳褲？
小婷黎左香港結埋婚，仲可以背住佢再搞過？有無過份得咁緊要？

反而係一個新移民黎到香港受人白眼，希望賺錢接家鄉的女朋友回來；另一個新移民不願意讓人知道自己新移民的身份，努力奮鬥希望成為香港人，人在異鄉的那種苦悶與悲哀，就在這個故事中透過多年的描述很完完整整的道了出來。

話分兩頭，倒是豹哥這個角色，很有愛情故事的甜蜜蜜感覺....
知道張曼玉怕老鼠，胸口又掛了個米奇老鼠襟章
為了逗她高興，特意在背脊雕龍雕鳳的紋身中紋上一個米奇老鼠.....
而她還要不太領情.....
到後來要著草了
還對她說回去洗個澡，一街都是比豹哥更好的男人......
哇靠多甜蜜蜜.......

就把我遺留在經典的時代 之六 英雄本色3 夕陽之歌

〈就把我遺留在經典的時代 之六 英雄本色3 夕陽之歌〉

如果說英雄本色1同2係講江湖情仇道義的英雄電影，那麼英雄本色3就是在江湖情仇道義襯托著的愛情電影......

梅豔芳的角色真的很有魅力，槍林彈雨之中的剛烈，配合著在周潤發想成全她和梁家輝而故意激怒她之下那一幕的柔弱。阿Mark，阿民，田中弘義三個男人中間周旋，製造出頗強烈的張力。

從來拍到第三集都是要拍前傳的，倒是解釋了Mark哥那副超同件大褸的由來.....

未去過越南，對越戰也沒有半點認識，不過一個離鄉別井的華僑，在一個落後貪腐而兵荒馬亂的國家生活，對回家不回家的那種掙扎，回來又是否是個好的選擇這些的場面，也是有一定感受的......
我想，看完之後去越南的話，或者會更有感覺吧﹗

PS 原來夕陽之歌咁多年前已經有了，我成日以為係梅豔芳晚期的時候寫俾佢的......

https://www.youtube.com/watch?v=pDSrS-TBys4
斜陽無限 無奈只一息間燦爛～
隨雲霞漸散～逝去的光彩不復還～～

就把我遺留在經典的時代 之五 英雄本色2

〈就把我遺留在經典的時代 之五 英雄本色2  A Better Tomorrow Again 〉

毫無疑問，我係鍾意英雄本色第二集多過第一集的

無辦法，第二集個故事真係比第一集流暢
由阿傑入去做臥底
逼宋子豪出番黎查單案
到龍四俾人出賣，去美國既時候遇番阿Mark 哥個孖生細佬阿Ken
到最後（一如所有英雄電影般）復仇成功
係幾緊湊精彩

亦都毫無疑問，我係鍾意阿Ken呢個角色設定多過阿Mark哥，好多的
無他，阿Mark係好有義氣，但係都係果句，英雄本色第一集教大家 Head Shot既重要性，自己走去報仇，又唔爆人頭，俾人打跛左自己隻腳，然後走去幫人洗車係地下執錢，然後忽然又彈番出黎講自己唔見左既尊嚴要拎番......人格太分裂我投入唔到....

相反阿Ken，角色性格好一致好立體，係美國餐廳好照顧當地既飛仔，對住黎搞事既鬼佬又叫人open your fucking mouth and eat the rice，幫龍四重新振作果幾幕真係好經典....
然後返香港幫龍四報仇，繼承了Mark哥的義氣....

又話分兩頭，我都真係幾鍾意徐克演繹呢個角色龍四，傻左果時個眼神真係好空洞.....

再睇番D 對白，都真係幾感觸
1987年既電影，多麼有時代意義的一年（笑），我諗都係講緊97吧？
都三十年過去了，估唔到都仲係咁啱用....

「有D 人千方百計想離開自己屋企，有D人想返去
有D 人，連落腳既地方都無....

都係自己既地方好D ....」

雖然劇情入面都係有好多格硬黎嫁啦
做臥底帶個女人返屋企.....殺手仲同你玩公平競技俾枝槍你隊冧自己....
不過都無損成套戲既主線 :D

Let the asshole to eat the rice first....
 

//有D 人千方百計想離開自己屋企，有D人想返去
有D 人，連落腳既地方都無....

都係自己既地方好D .... //

呢一個鏡頭真係好經典

好鍾意呢一個鏡頭，望住阿傑逃走出黎果一撻血跡（不過血跡放一晚都未變黑？？）

〈就把我遺留在經典的時代 之四 白髮魔女傳〉

〈就把我遺留在經典的時代 之 白髮魔女傳〉

細個唔係好敢睇白髮魔女傳，魔女已經夠得人驚啦，仲要白髮喎，睇完實發惡夢啦....

未睇過梁羽生原著.....有朋友介紹話電影好浪漫喎

咁就專心認真睇一次啦....

嘩，張國榮真係好Charm😍😍😍.....大鑊，好似仲charm過林青霞添.... 

武當掌門傳人八大派武林盟主繼承人，武功高強心地善良而又瀟灑不羈，咁好package，竟然為左個見過唔係幾多次面既妖女放棄晒一切....
如果變為現代版，大概就係個文武雙全的富二代，在夜場見到個壞女孩，而個妖女由於受傷所以要幫佢啜傷口療傷（不禁駁故講句有毒咩你啜乜野呀？），啜啜下啜到慾火焚身就地赴巫山，而富二代甘心放棄老豆既一切而山盟海誓去私奔遠走高飛咁上下啦......

然後一個妖女既師傅吳鎮宇姬無雙就收晒成個武當皮，妖女被嫁禍係兇手，富二代懷疑係妖女下既毒手，嬲到一下（唔使一夜添呀）白髮.....

最後兩個人雙劍合壁隊冧左真係好邪惡同恐怖既連體人姬無雙，白髮魔女仲係嬲阿富二代唔信佢，一走了之，然後富二代就守住當年應承過佢可以起死回生返老還童既仙花旁邊.....可能咁就一世了.......

都係ok浪漫既，尤其係大個左之後無咁怕恐怖野，白髮魔女都可以接受既~ ~

一齊聽下主題曲〈紅顏白髮〉~~
https://www.youtube.com/watch?v=T7mkB81AjJ4

就把我遺留在經典的時代 之三 歲月的童話

〈就把我遺留在經典的時代 之三 歲月的童話〉

唔係羅嘉良果首歌....

彷彿聽到了「一輩子都沒有機會搽唇膏的採紅花女孩，對城市女孩的怨懟聲」

高畑勳的作品，一個二十七歲的單身東京上班女性，請假到鄉下渡假，再一幕幕回想起以前小學五年級那一年發生的故事

怎麼說好呢？一定是沒有《再見螢火蟲》那麼煽情及催淚了
雖然《再見螢火蟲》果汁糖那幕真的很經典，但那個日本男兒居然窩囊如此，又是害死自己妹妹的感覺揮之不去

《歲月的童話》都沒有這些起伏
但總是覺得，能把一個平淡的故事說得很有餘韻，就是很高手才能做得到

看完之後，不禁會想起自己是否沒有童年的呢？
小學生有這麼渴望到鄉下旅行的嗎？
小學生有這種暗戀與這麼青澀而莫名其妙表白嗎？
小五女學生M到的時候在男同學圈子有掀起這麼大的反應嗎？
好像都沒有......

其實無乜共鳴
但好奇妙地果個餘韻好似都感受到
或者青春與回憶，都是很好消費的主題吧

話時話，入面果題數學題，三分之二個蘋果，用四分之一來除，就係三分之二個蘋果分俾四分之一個人，所以每人可以拎多四份？

就把我遺留在經典的時代系列 之二 烈火青春 1982

〈就把我遺留在經典的時代系列 之 烈火青春 1982〉

「我們一起去阿拉伯吧」

第一次聽〈烈火青春〉與譚家明，應該是sit馬傑偉教授堂談及新浪潮導演

1982年，我連精蟲都還未是
然而青春都是那是個模樣吧，不分世代
率性而為，愛與慾交纏

影片英文名叫Nomad, 亦是故事中張國榮想坐著去阿拉伯的那艘帆船的名字
載著青春的美夢啟航

原來我的理解能力都頗低，角色數目不多但感覺很複雜
看得頭也大了
看完影評再重新看了前半齣，才明白角色的關係故事的舖排

反正都是歌頌青春的電影，劇情，不重要了吧？

青春，多好

就把我遺留在經典的時代系列 之一 霸王別姬

〈就把我遺留在經典的時代系列 之一 霸王別姬〉

「我本是男兒郎，又不是女嬌娥」

二十年前，當我還是小學生的時候
家人帶我去新光戲院看了這齣《霸王別姬》（好似係因為有免費飛）
據他們所說，我悶得在開場後好久問了一句：到底開場未呀？
而因為這句說話，我俾佢地足足恥笑左二十年

二十年後的今天，我再認真重看一次
他媽的﹗開場仍然是很悶呢﹗而且張國榮在40分鐘才出場呀﹗🤣🤣🤣
帶個小學生去睇霸王別姬根本就係父母既錯😌😌

😌

說真的，如果不是一邊睇一邊睇住影評，都完全跟唔上劇情，原來劇情是這般深刻

張國榮在《春光乍洩》的角色是一個同性戀者，先天還是後天的沒有說明，反正就是個自然的同性戀者的故事

而張國榮在這齣《霸王別姬》的程蝶衣（小豆子），卻是一個因為後天進了梨園（戲班），要反串演女角虞姬而要「接受」自己是女兒身，而其後愛上了演楚霸王的師哥段小樓（小石頭）....
原來開場時小豆子不肯唸「我本是女嬌娥」，而不段唸錯的「我本是男兒郎」而被人懲罰，是因為還未接受到投入到女角這個身份，到最後被罰得唸得出「我本是女嬌娥」，就是終於接受了，最後也成名了，改了藝名程蝶衣而受人擁戴。

Gender Confusion (性別錯亂）典型都是生理性的，他媽的程蝶衣這個角色寫得真的多麼有深度而複雜，創造了一個後天Gender Confused的案例......

程蝶衣最後自盡，是因為師哥段小樓提醒了自己其實是男兒身。是戲劇化了一點，但完完全全點出了性別錯亂的人所受的壓力......

包含了京劇、性別錯亂、日軍侵華、國共內戰、文革，真是一部很深刻及沉重的經典電影.....

熊熊烈火試煉的燒臘之旅 之一 雙豬嘜

<熊熊烈火試煉的燒臘之旅 之一 雙豬嘜 >

係好耐好耐之前，我曾經提過諗起想去食勻港九新界大街小巷小忍忍於路邊大忍忍於街市的罨耷燒味舖.....

不過，一來食開一兩間就無乜動力take risk 試新野，二來燒味咪又係來來去去叉燒燒肉切雞燒鴨，有乜鬼野好寫姐....🙄

不過呢間都有驚喜，擺盤都already speaks thousand words !
舖頭細細，我見到個個都同燒味師傅咁鬼熟既喂...熟到個個都自己入去舀湯....😦😦😦
打下牙較...都幾過癮...

翻叮指數： ⭐️⭐️⭐️⭐️